Zawhte In Mithi Ruak An Ei

Russia, Bataysk khua ih um pitar cu a innsung ah a tlu ih a thi cih, amah lawng ih um a si ih a thih thuhla cu zohman in an thei lo. Zawhte tum zetzet 20 a vulh, vengsung mipi in a zawhte pawl cu an fel zet an tiih ‘Gentle Giants’ tin an ko.

Zarhhnih hnu lawngah a ruak cu an hmu, a taksa hrek cu a zawhte pawlin an rak ei. Hnaṭuantu pakhat in a phone rero nan phone a kaih thei lo ruangah zarhhnih hnuah palik pawl hnenah a sim thei, palik pawlin a innsung an va zohdik ih zawhte 20 in a tak an rak ei rero lai cu an hmu.

A rim khal a sia tuk zo. Ramsa Humhimtu pawlin zawhte cu an la ih an kilkhawi. Zawhte damcak deuh pawl cu £30 in an zuarsuak, zawhte leitu hnenah mithi ruak an ei thuhla hi an sim le sim lo cu theih a si lo. Ṭhenkhat zawhte cu an harhdamnak a ṭha lo ruangah an tuamhlawm rero lai.

Ṭuanvo neitu in, “Zawhte pawl hi zarhhnih sung anmahten an um. Rawl aum lo ih tidai in ding khal aum lo. Ziang an ei ding? An hmuhhmuh mi an ei ko ding. Theihthiam an um zet” a ti. Nikum Covid-19 thlisia a hrang lai khalah Colombia ram ih um pitar kum 79 mi Clara cu a inn sungah a thi.

A thih thuhla hi an thei lohli lo, a zawhte 7 in a taksa tlunlam an rak ei thluh hnu lawngah an va hmu. Venghnen pawlin thilrim sia zet an thei ih an inn kiangkap ah thothe an tamtuk ruangah palik pawl an ko ih mithi ruak cu an hmu. Tualsung palik bawi in, “Ka hnaṭuan sungih ka thilhmuh mi lakah a rapthlak bik” a ti.

Be the first to comment

Leave a Reply

Your email address will not be published.


*