Kum 66 mi Warren Jeffs cu amah le mah zawlnei ah a ruat’aw ih dungthluntu khal a nei tam zet. Sakhuanak le ramkhelhnak in minung thluak arak her danglam thei nasa. Warren Jeffs cu December 3, 1955 ah US, California ah a piang.
Hirngtu a pa cu Fundamentalist Church of Jesus Christ of Latter-Day Saints (FLDS Church) hotu a si, a pa khal nupi 20 a nei. A pa in a thihsan hnuah a pai ih nupi pawl cu nupi ah a nei thluh, amah nei duhlotu pakhat aum ih an dawisuak hnuah pasal nei thei nawn lo dingin hremnak an pe.
Thluntu 10,000 lenglo a nei ih Zawlnei ah an ruat. A dungthluntu pawl thawn ramlak ah an um ṭheu. Nupi 78 a nei ih a nupi 24 cu kum 17 hnuailam an si. Nauhak kum 12 mi khal nupi ah a nei ih kum 15 a kim ah nau a nei. A nupi pawl cu an hmelṭha zet, an hnipuan cu hlanlai hnipuan lawng a hruhter thluh.
An kawhhran member mipa pawl cu nupi 3 nei dingin a fial, nupi nei tamtam cu vanram an kai ding tin forhfialnak a nei. An umnak sungah nunau pawngsual le kumkim lo itpit cu thilthleng pangai ah a cang.
Midang fa khal amai fa vekin a zoh ih fa 500 hrawng anei. A thuhla cu tualsung ṭuanvo neitu pawlin an thei ih an zingzoi rero hnu 2006 kum ah an kai. Damsung thawngtla dingin Utah State Prison thawnginn sungah an khum lai.
A thuhla ngankhumnak documentary cu Netflix in an tuah ih June 8, 2022 ah an tlangthlan ding. Tu’khalah a member FLD pawl an um lai ih Jeffs cu Pathian ṭongkam simtu Zawlnei ah an ruat lai, diklo zetin cozah in an kai’ an ti.
Leave a Reply