Ziangruangah Kinma Khua An Urkang? An Urkang Hlan Ih An Thuhla Cipciar

June 15, 2021 ah ralkap in Magway Division, Kinma khuasen ih inn zaten an urkang thluh ih an khua cu vutcam ah a cang. Kinma khua ah inn 250 an um ih mipum 1000 lenglo an khuasa, Kinma khua kiangkap ah ralkap le mipi kilhimtu pawl an doaw ṭheu.

May thla sungah an khua kiang Kin Soke khua ih ralkap lamtang khua lal cu zo ti theih loin an that, cutin ralkap le mipi kilhimtu pawl an kapaw ciamco ih ralkap lam 30 hrawng an thi.

June 12 sunah Kinma ihsin peng 12 hlatnak ih um Deedotekwin khua lal, ralkap lamtang cu zo ti theih lo mino 2 in an kap that sal. Mino 2 cu an tlanhlo hngal nan ralkap lamtang pawlin an bike licence plate an rak hminsin man, bike licence fehtlangin an zingzoi vivo ih Kinma khuami ih bike a si ti an theisuak.

Bike neitu zingzoi dingin ralkap ṭhenkhat cu uniform hruh loin Kinma khua lamah an feh, Kinma khua an thleng hlanah mipi kilhimtu pawlin an rak bawh ih an kapaw ciamco. Cutawk ih an doawknak ah ralkap lam 15 an thi ih mipi lam pakhat in hliam a tuar.

Cumi ihsin palik/ralkap tam zet cu Kinma khua nuai dingin an poksuak ih an inn le lo pawl an urkang thluh, tlansuak ve thei lo pitar le putar nupa tuakhat Mya Maung (kum 85) le Kyi Hmein (kum 83) cu an inn thawn urkang that an si.

Kinma khua urkang a si hnuah ralkap thuthang MRTV ah ‘Mipi kilhimtu pawlin Kinma khua an urkang’ tin thu an phuang. Mipi kilhimtu pawl khalin “Ziangtik hmanah cuvek thil kan tuah lo ding, kannih cu mipi kilhimtu ding kan si ih mipi humhim lawng kan hna a si” tin Myanmar Now thuthang hnenah an sim thei.

Be the first to comment

Leave a Reply

Your email address will not be published.


*