Zo In A Neh Ding? Kan Ram Dnhmun Ah Zo In A Neh Ding?

(Rev. Stanley Hmung): “Kan ram dinhmun ah zo in a neh ding? Ziang tin a net ding? Hi thusutnak hi nitin kan sut aw ringring mi a si. Bible sungih thuanthu ka mang “Zankhat ah siangpahrang Belshazzar in rawl ei puai tumpi a tuah ih a kuthnuai bawi le upa pawl thawngkhat a sawm ih hmunkhat ah zu an in tlang.

Cutiih zu an in lai ah Belshazzar cun Jerusalem Biakinn ihsin a pa Nebuchadnezzar in sui khuathai le ngun khuathai le kheng pawl a rak lakmi kha rak keng dingin a cah i zu innak ah an hmang. Rinlopi ah milai kut pakhat a lang ih mei-inn vannak thuam zawn phar parah cun ca a ngan.

Siangpahrang pa in a hmu tikah a tih ngaingai ih a mithmai a raam thluh. Canganmi a siar theitu le a sullam a sim theitu an umlo ruangah Daniel in a letsak. A nganmi cu, ‘Mene, mene, tekel upharsin,’ ti a si. A tican cu “na ram uknak hi Pathian in a ni a siar zo ih a cemter cing ding, cuai thlai in na kim lo, na ram uknak hi thenthek thluh a si ding” tinak a si (Daniel 5).

A si, Jerusalem biakinn ih Pathian thil thianghlim pawl zu in nak ah hmang in a borhhlawh ter ruangah a uknak ram a cem ta riai. Leitlun ah diklo zet i nungtu pawl an hlawhtling zet a bang nain Pathian in a netnakah thu a then leh ding. Tulai kan boruak ah zo in thil borhhlawh a tuah? Zo in Pathian biakinn le thilri thianghlim pawl siatsuah nak a tuah? tihi kan thei thluhmi a si. Pathian in thil thalo an tuahmi a lehrul tengteng ding.

Jesuh ih tahthimnak a simmi thazang ka ngah zetmi a um. Veikhat lai ah mi pakhat in a lo sungah thlaici tha a vorh. Zankhat, mi pawl an ihthat sungah a ralpa in rawl ci lak ah hrampi ci a vorh ve. Thlai kho le hrampi an thang tlang. A hnen-um pawl an ra ih, ‘Bawipa, na lo sungih na vorhmi cu thlaici tha an si lo maw? Khuiinso hrampi hi an rat? Hrampi cu kan va bawt pei maw?’ tiah an sut.

Cutikah Bawipa in ‘Bawt hlah uh, rawl kung le hrampi cu thang tlang ko seh, thlai rawl nan bawt ngah pang ding” tiah a let (Matt 13). Jesuh in a tikcu caan hngak hrih ding a zirh duhmi a si.

A si, thinsau ih hngak hi zumtu hnatuan a si ko. Habakkuk in “Kanmah in dotu pawl Pathian in a hrem tikcu caan, thinsau in ka hngak ding. Theipi in rah an neih lo ih Sabit hri ih sabit a rah lo hmanah, Olif kung ih olif rah an siat theh ih, Lo in rawl a suah lo hmanah, Tuu pawl an thih fai theh ih, Caw inn tla an lawng theh hmanah, Ka lungawi in ka thin a nuam thotho ding. Ziangahtile Bawipa Pathian cu i runtu a si. Cungnungbik Bawipa in thazang i pe. Zukneng bangin ka ke a fekter, Tlangsang parah him tein i ret” tiah a ti (Habakkuk 3:16-19). Kan ram buainak cu Bawipa in a neh ding. Bawipai hnatuan hngak thiamtu si zuam uhsih. Amen.

Be the first to comment

Leave a Reply

Your email address will not be published.


*