Zomi PDF, PDF(Kalay), CNDF, RKDF Le ပ.က.ဖ Tangtlang In Ralhrang Thawn An Kapaw

January 6, 2022 ah Zomi PDF, PDF(Kalay), CNDF, RKDF le ပ.က.ဖ pawl tangtlang in ralhrang thawn an kapaw ciamco. Ralhrang pawl cu Natchaung lam ihsin Falam peng sung Weibula lam ah an feh ih Kalay le Chin ramri hmun pakhat ah tualsung mipi kilhimtu pawl thawn an kapaw.

Kalay University ih umhmun khuar ralhrang pawlin ralthuam picang thawn mipi kilhimtu pawl umnak kiangkap cu an kap ciamco. Tu’khalah nasa zetin an kapaw rero lai ih an kahawknak sungih thilthleng cipciar cu theih a si hrih lo. Kalaymyo kiangkap ah ral a muan lo ruangah tualsung mipi pawl cu Kalay-Gangaw lamah feh hrih lo dingin Kalay-PDF in theihternak an suah.

Thudang: Ralhrang Pawlin Falam Peng, Parmunchaung Khuami Pu Hram Lian Sum An That
Falam peng, Parmunchaung khuami mipa kum 40 mi Pu Hram Lian Sum cu ralhrang pawlin an that hnuah a ruak cu PDF hnipuan an hruhter ih an hlon. Pu Hram Lian Sum hi thinlung lam damlonak nei a si.

Ralhrang pawl cu Parmunchaung khua ah an cam ih 2021, December 29, 30 le 31 zan an riak. Baptist Biakinn kilnak inn ih um Pu Hram Lian Sum cu an that ih a ruak cu hnawmhlonak hmun ah an hlo. January 3, 2022 ah tualsung mipi pawlin a ruak cu an hmu.

Pu Hram Lian Sum ih lu ah hliamhma nazet aum ih a lu a kuai. Parmunchaung khua ah inn 50 lenglo an um ih ralhrang pawlin innsung ih um thilri ṭha pawl cu an rak ruksak thluh. Ralhrang 100 hrawng cu January 5 zinglam nazi 10:00 hrawngah Chaung Khuah ihsin Pamun Chaung khua ah, Waibula lamah an kaiso.

Ralhrang pawlin Hakhalay khuami 2 an kai ih an hruai vivo, an kaihmi pakhat sawn cu thinlung kimlo a si ih mizan ah an suahsal nan pakhat sawn cu an hruai. Hakhalay khuami in, “Mizan ih an suahmi cu ralhrang pawlin Waibula ramlak ah an hruaikual vivo thu a rel.

An kaihlai mi pakhat hi a thi maw a nung ti khal kan thei hrih lo, ramlakah a kor le a bawngbi cu kan hmu. Asinan a ruak cu kan hmu lo, ralhrang pawlin an hnipuan an hruhter ih lamzin khihhmuhtu ah an hruai maw si ding, asilolen ralkham awknak ah an hmang tla a si thei” a ti.

Be the first to comment

Leave a Reply

Your email address will not be published.


*