ZRA Pawlin A Veithumnak PDF An Tibuai

Zomi Revolutionary Army (ZRA) hriamkai pawlin tulai ramsung mipi kilhimtu PDF pawl an rak hnaihnok ṭheu. September 19 zinglam nazi 6:00 hrawngah ZRA mipum 28 cu meithal kengin Chinram, Tedim-India ramri ih um Thinglei khua ah an va lut ih Hualngo PDF pawl an hawl.

Khua sungah Hualngo PDF pawl an hmu lo ruangah an innsang pakhat ciar an kai. PDF innsang khat ah mipa pakhat ciar tin minung 5 cu an hruaisuak ih an khuapawn ih Pundaung tiva kiangah an hrem.

An mit cu puan in an tuam ih an kut khal dunglam ah an tawnbet. Khuk an bilter hnuah an vuak ciamco, an sungkhat pakhat in “Hualngo PDF pawl ih umnak an sut, pathum cu sundir ah an tlungter. Pahnih cu an kailai ih an vuak ciamco, zan lawngah khua an tlungter.

An hliamhma pawl tuamhlawm dingin Mizoram lamah an feh, ZRA pawl cu AK meithal, M16 pawl an keng. An vuak mi pakhat cu a dunglam a vual thluh, a taksa pum ah an vuaknak hliamhma aum. Funghreu 5 a siat thluh hlanlo an vuak, pakhat cu a lu thit a ṭul, an zaten hliamhma nasa zet an tuar” a ti.

May 22, 2021 le June 16 ah PDF –Zoland pawl ih umhmun khuarnak cu ZRA in an kap ih an siatsuah zo, an thilri bungrua pawl khal an siatsuah sak thluh. ZRA cu India cozah dodal ih hriamkai an si ih ramri ah an um, an umnak kiangkap ah hriamkai pawlkom dang an um ve cu rem an ti lo thu an suah zo. (#Zalen)

Be the first to comment

Leave a Reply

Your email address will not be published.


*