Zuhmun KTV Ah Ralbawi A Itthat Ih A Meithal Le Sumpai A Hlo Ruangah Hnaṭuantu Pakhat An Hrem That, Rul In A Cuk That Tin An Phuang

Bago peng, Pyay khawpi ih ralbawi Aung Mon Hein cu KTV ah a feh ih zu a ri tuk ruangah a itthat lanta. A itthat sungah zo ti theih loin a meithal, cerek, phone le sumpai an ruksak. Ralhrang pawlin thil rutu cu an hawl ih hmun ṭhenkhat khal an kharpit.

Tualsung mi pakhat in, “Spider KTV ah a rualpi pawl thawn an va feh ih nuam an cen. May 15 zan ah an feh ih May 16 zinglam tiang an cam. Ralbawi cu a itthat lanta, a thangharh tikah cun a thilri bungrua pawl a hlo ti an thei ih an hawl rero lai” a ti. A pistol, cerek (6), mobile phone le sumpai tingkhat a hlo.

KTV ih hnaṭuatu mipa kum 27 mi Wei Yan Soe cu rinhlel thu in an kai ih thu an sut, an hrem ciamco hnuah an kap that. Tualsung mi pakhat in, “May 16 zinglam ah a meithal a hlo ti a thei. KTV sungih hnaṭuantu pawl lakah an zingzoi ih Wei Yan Soe cu aum lo. Hmun dangah arak feh.

May 18 ah Irrawaddy, Yekyi khua ah an va kai ngah ih Pyay khawpi ah an hruaisal. Thu an sut ih an hrem ciamco hnu May 19 ah a thi. Ralhrang pawlin a thilruk mi pawl retnak khihhmuh dingin kan hruainak ah rul in a cuk that tin an phuang” a ti.

A taksa parah meithal kahnak hliamhma pathum aum. Ralbawi Aung Mon Hein khal tlunlam an pule pawlin an kai ih an hrentang lai. A meithal le a thilri bungrua cu an hmu hrih lo.

Be the first to comment

Leave a Reply

Your email address will not be published.


*